Fisherman's Kitchen hervestig in nuwe, ruim perseel
Nuwe perseel by Woerman Brock Vineta
DIE gewilde seekos-restaurant Fisherman's Kitchen het onlangs na 'n groter en meer moderne perseel in Swakopmund verskuif.
DIE gewilde seekos-restaurant Fisherman's Kitchen het onlangs na ’n groter en meer moderne perseel in Swakopmund verskuif.Hulle is nou in die Woermann Brock Vineta sentrum.
Die skuif is gemotiveer deur 'n behoefte aan meer spasie, beter sigbaarheid, en verbeterde fasiliteite om hoër standaarde van diens en gasvryheid aan te bied.
Eienaar Jan Burger sê die nuwe lokaal bied ’n reeks voordele wat by die vorige ligging nie beskikbaar was nie. Die restaurant beskik nou oor ’n binnebraai wat ook as kaggel dien tydens koue dae, en dit skep ’'n warm atmosfeer vir gaste om langs ’'n vuur te sit en 'n ete te geniet. Die natuurlike lig en beter toegeruste kombuis dra by tot ’n aangenamer eetervaring en meer doeltreffende voorbereiding van geregte.
Fisherman's Kitchen fokus op vars seekos, met stokvis, calamari en kabeljou wat daagliks van plaaslike visserye verkry word.
“Varsheid is vir ons van uiterste belang,” sê Burger. “Ons ondersteun kleinskaalse, plaaslike vissermanne wat op hul beurt verseker dat ons elke dag vars produkte ontvang – soms selfs nog lewendig.”
Die restaurant se missie is om gehalte, bekostigbare kos aan te bied, met spesiale fokus op die plaaslike mark.
“Sonder ons plaaslike gemeenskap sou ons nie kon bestaan nie,” sê Burger. “Ons pryse is doelbewus mededingend om meer plaaslike kliënte te lok en te bedien.”
Alhoewel toeriste welkom is, bly die fokus op die ondersteuning van plaaslike inwoners.
Die nuwe perseel is geleë in ’n residensiële area, wat maklike toegang verseker. Sportliefhebbers kan ook groot sportgeleenthede op die restaurant se grootskerm volg, terwyl hulle van die spesiale braaigeregte geniet.
Burger sê hul visie is om Fisherman’s Kitchen oor die volgende paar jaar in die top tien restaurante van Swakopmund te plaas.
“Die kompetisie is sterk, maar ek glo ons kombinasie van gehalte, atmosfeer en diens stel ons op ’n besondere plek,” noem hy.
Die nuwe besigheidsure is Maandae tot Vrydae van 11:00 tot 21:00 (of selfs later), afhangende van hoe besig dit is. Saterdae is hulle oop vanaf 09:00 tot 21:00, asook op vakansiedae. Sondae is hulle toe.
Gereelde spesiale aanbiedings en weeklikse disse word op hul Facebook-blad gedeel, en kliënte word genooi om in te loer en self die nuwe lokaal en spyskaart te kom verken.