Amper almal asem ongesonde lug in
’n Skokkende nuwe verslag deur die Wêreldgesondheidsorganisasie (WGO) het onthul dat 99% van die wêreldbevolking ongesonde lug inasem.Die verslag, wat meer as 6 000 stede en 117 lande dek – insluitend Namibië – dui aan waar lugbesoedelingsvlakke en verwante gesondheidsrisiko’s die hoogste is.
“Byna die hele wêreldbevolking (99%) asem lug in wat die WGO se luggehaltelimiete oorskry en bedreig hul gesondheid,” het die organisasie gesê.
Dit het bygevoeg dat ’n rekordgetal van meer as 6 000 stede nou luggehalte moniteer, maar die mense wat daarin woon, asem steeds ongesonde vlakke van fyn deeltjies en stikstofdioksied in, met mense in lae- en middelinkomstelande wat die hoogste blootstelling ly.
Die bevindinge het die WGO aangespoor om die belangrikheid daarvan te beklemtoon om fossielbrandstowwe te beperk en tasbare stappe te doen om lugbesoedelingsvlakke te verminder.
Die WGO het voorts gesê die bewysbasis vir die skade wat lugbesoedeling aan die menslike liggaam aanrig, het vinnig gegroei, en dui op aansienlike skade wat veroorsaak word deur selfs lae vlakke van lugbesoedeling.
Deeltjies kan diep in die longe en die bloedstroom binnedring, wat kardiovaskulêre, serebrovaskulêre (beroerte) en respiratoriese impakte veroorsaak.
“Daar is al hoe meer bewyse dat deeltjies ander organe beïnvloed en ook ander siektes veroorsaak.”
Riglyne hersien
Verder word stikstofdioksied geassosieer met respiratoriese siektes, veral asma, wat lei tot respiratoriese simptome soos hoes, hyg of asemhalingsprobleme, hospitaalopnames en besoeke aan noodkamers, aldus die WGO.
Die gesondheidsorganisasie het verlede jaar sy luggehalteriglyne hersien en dit strenger gemaak in ’n poging om lande te help om die gesondheid van hul eie lug beter te evalueer.
“Huidige energiebekommernisse beklemtoon die belangrikheid daarvan om die oorgang na skoner, gesonder energiestelsels te bespoedig,” het dr Tedros Adhanom Ghebreyesus, WGO-direkteur-generaal, gesê.
“Hoë fossielbrandstofpryse, energiesekuriteit en die dringendheid om die dubbele gesondheidsuitdagings van lugbesoedeling en klimaatsverandering die hoof te bied, beklemtoon die dringende behoefte om vinniger te beweeg na ’n wêreld wat baie minder van fossielbrandstowwe afhanklik is.”