Gesondheidsministerie gesoebat om oortyd te betaal
Die Staatsdiensunie van Namibië (PSUN) het gister ’n verklaring uitgereik waarin hulle die ministerie van gesondheid versoek om die kwessie van onbetaalde oortyd vir noodsorgpraktisyns (ECP) aan te spreek.Volgens die vakbond het hulle sedert verlede jaar by die ministerie gepleit om sy verpligtinge na te kom.
“Die kantoor van die uitvoerende direkteur het ons kommunikasie in hierdie verband geïgnoreer, en ons moes die saak saam met ander by die kantoor van die Eerste Minister registreer,” het die vakbond gesê.
Daar is berig dat ambulanswerkers in die Otjozondjupastreek opgehou het om oortyd te werk, en gevolglik word inwoners gedwing om op hul eie onkonste van hierdie dienste gebruik te maak.
Werkers sê hulle is vir die laaste drie maande van 2022 nie oortyd betaal nie en doen ’n beroep op die ministerie om die saak dringend aan te spreek.
PSUN het die ministerie verder daarvan beskuldig dat hulle nie beplan nie en dus onverantwoordelik is.
“Daar is duidelik ’n beplanningstekort van kritieke proporsies, en dit is uiters onverantwoordelik gegewe die hulpbronne tot hul beskikking,” aldus die PSUN.
Die vakbond het die kantoor van die Eerste Minister gevra om in te tree en die probleem te help oplos.
Die gesondheidsministerie se woordvoerder, Walters Kamaya, het bevestig dat ECPs nie oortyd betaal is nie en gesê dit is omdat die goedkeurings langer neem as wat verwag is. “Die volle proses moet oorweeg word. Die Erongostreek het gisteroggend goedkeuring ontvang,” het Kamaya gesê.
Die ministerie kon nie ’n presiese tyd vir ander streke se goedkeurings verskaf nie.