Haitope, Paulus tree as kampioene na vore
Padwedlope
Die nuwe roete wat Saterdag vir die elite atlete in die 21.1 kilometer gewag het, was 'n welkome uitdaging vir die langasems in die halfmaraton.
Lavinia Haitopi en Daniel Paulus is Saterdag as die nuwe kampioene van die tiende QKR Navachab Gold-halfmarathon by Karibib gekroon.Haitopi, van die Nampol-klub, het die 21.1 kilometer in 1 uur 16 minute 37 sekondes voltooi, terwyl Paulus van die Namibiese Korrektiewe Dienste (NCS) met 1:04:38 op die stophorlosie oor die eindstreep gedraf het.
By die eindstreep het Paulus, ná sy tweede oorwinning in ‘n Navachab-halfmarathon, waardering uitgespreek vir die res van die voorste manshardlopers wat hom hard gedruk het.
“Ek het die wedloop vandag geniet. Dit was lekker om my teen die bestes te meet. Die nuwe roete en die oggend se winderige toestande het dinge interessant gemaak.”
Haitope het gesê die bult wat kort ná die wegspring op die roete was, was ‘n uitdaging, maar sy is dankbaar om as wenner uit die stryd te kon tree. Sy is aan die voorberei om by die komende Kaapstad-marathon die 21.1 km-wedloop te takel.
Die Namibiese halfmarathonrekord vir vroue (1:07:49) staan sedert 4 Junie 2022 agter die naam van die gedugte Helalia Johannes.
Martha Shivolo (NCS) was tweede in 1:16:57, met Alina Armas van die Namibiese Weermag (NDF) derde in 1:19:35. Shivolo het verlede jaar die vrouewedloop gewen.
Jeremia Shaliaxwe van Nampol was tweede in die mansafdeling (1:06:50), gevolg deur die gewese Olimpiese marathonhardloper Rainhold Tomas van die NCS in 1:07:56. Shaliaxwe was in 2023 die kampioen.
Paulus is die Namibiese rekordhouer oor 21.1 km met 1:01:10 wat hy op 4 Junie 2022 in Gqeberha, Suid-Afrika, aangeteken het. Hy is een van min Namibiese atlete wat tans aan die deur klop om vir die 2025 Wêreldatletiekkampioenskap in Tokio, Japan, te kwalifiseer.
10 km-wedloop
In die korter afstand, maar nie minder belangrik nie, het die 44-jarige veteraan Helalia Johannes (NDF) geseëvier, met Lucia Lyaalukeni van die NCS tweede en Beata Jeremiah derde.
Johannes is die rekordhouer van die Namibiese 10 km-padwedloop in 30 minute 59 sekondes wat sy op 23 Junie 2019 in Durban, Suid-Afrika, tydens die Spar Grand Prix-reeks behaal het.
By die mans was Simon Paulus (NCS) die vinnigste, gevolg deur Teofilus Lisias tweede en Thomas Shigwedha (NCS) in die derde posisie.
Meer as 700 ywerige drawwers en stappers het Saterdag aan die 21.1 kilometer, 10 km en 5 km-pretloop deelgeneem.
Bethold Karumendu, die jarelange organiseerder van die byeenkoms, droom steeds daarvan om die Navachab-halfmarathon by Karibib ‘n ware internasionale geleentheid te maak.
– [email protected]