Swanger Risa haal haar vinnigste Two Oceans
Padwedlope
Langasems van Namibië het saam met die Suid-Afrikaners en inskrywings van elders op die uitdagende roete om die skiereiland toegesak.
Selfs met ‘n “passasier” was Risa Dreyer van Windhoek Saterdagoggend die eerste Namibiër oor die eindstreep in die Two Oceans-ultramarathon van 56 kilometer in Kaapstad.Bekende landmerke soos Smitswinkelbaaipas, Klein-Chappies, Chapman’s Peak en Suikerbossie het vir hulle op die skilderagtige roete gewag.
Dreyer het die 56 km in 4 ure 20 minute 21 sekondes voltooi en algeheel 23ste in die senior vrouewedloop geëindig, waar Gerda Steyn van Suid-Afrika die haar vyfde opeenvolgende titel opgeraap en opnuut ‘n nuwe rekordtyd opgestel het.
Die Namibiër het gemiddeld teen 4 minute 40 sekondes per kilometer gedraf. Haar tyd by 42.2 km vir die gewone marathon is op 3:15:45 gemeet.
Dreyer, wat deur haar man Riaan Burger ondersteun is, sê: “Vanjaar se Two Oceans was ekstra spesiaal. Ek verwag tans ons tweede babatjie en het baie gewik en weeg of ek moet hardloop of nie. Maar nadat ek al die groen ligte by die dokter gekry en heel oukei gevoel het, het ek besluit om te hardloop! En eks so bly en dankbaar.
“In die wedloop het ek regtig goed gevoel en net alles ingeneem. Ek weet dit sou weer my laaste wedloop vir ‘n rukkie wees, maar dit was so ‘n voorreg! Ek het eers ná die halfpadmerk besef ek kan my vorige beste tyd van 4:29 verbeter, en toe het ek net hart en siel in die res van die kilo’s gesit!
“Ek is verstom oor hoe goed vanjaar se vrouehardlopers was. Die tye was besonders goed. Ek was ook verras om te hoor ek is die eerste Namibiër oor die lyn. Die mans is eintlik in hierdie stadium veel sterker as ek. Maar dit was ‘n goeie dag en ek hoop om gou weer terug te wees vir nog!
“Dit was my sewende ultra-deelname (56 km) en daai sub-4-ure wink vir my!
“Vir die res van die jaar gaan ek op my gesin en my gesondheid fokus, maar sodra ek kan, is ek weer terug vir my gunstelinge wedlope soos die Two Oceans en die Comrades. Dit hou my hart aan die klop en my voete op die aarde.”
Suid-Afrika se Gerda Steyn, wat verlede jaar die dubbele prestasie behaal het om beide die Two Oceans en die Comrades te wen, het die 56 km roete in 3:26:54 afgeblits en daarmee haar eie rekords van verlede jaar oortref (3:29:06). Sy is ook die eerste atleet wat die Two Oceans vyf keer op ‘n streep gewen het.
21 KILOMETER
JG van Graan, Louise van Graan en Nicole Spangenberg het die beste van die Namibiërs in die 21 km-halfmarathon gevaar.
JG het in 1:27:07 dertiende in die ouderdomsgroep 40 tot 49 vir mans klaargemaak en was die algehele eerste Namibiër in die wedloop. Spangenberg eindig met 1:39:53 veertiende in dieselfde ouderdomsgroep vir vroue, terwyl Louise in 1:40:19 vyftiende die eindstreep oorsteek.
– [email protected]